特首梁振英（CY）最近因為僭建問題搞到一身蟻，噚日佢出席滙豐社區節開幕禮時，好似心事重重咁，到佢上台講嘢嗰一刻，仲唔覺意開口夾着脷
搞gag變贈興
CY噚日出席喺中環舉行嘅滙豐社區節活動開幕禮，佢上台致辭時搞咗個爛gag，話銀行除咗賺錢，顧住佢哋個P（Profit，利潤）之外，仲有兩個P都好緊要，分別就係People同Planet，即係要關懷員工同環保。本來咁講都冇乜問題，之不過最衰呢個係滙豐嘅活動，而滙豐上個禮拜先至炒咗廿幾個零售銀行嘅員工，轉個頭CY又叫佢哋唔好為咗錢，要顧吓企業社會責任，咁仲唔係贈興？
在特首選舉時挺唐嘅滙豐亞太區行政總裁王冬勝（Peter）都有出席活動，雖然CY當選後已經搞過「大和解」，Peter都有去過特首辦親自面見CY，但難免令人覺得心入面硬係有條刺，加上CY噚日台上一席話中話，條刺好似再拮入咗。華華現場所見，雖然兩位喺台下都有傾有講，但活動完結後二人齊齊唔肯接受記者訪問，CY更由工作人員通道上車，有啲嘢囉。
另一邊廂，港交所（388）前朝同現任主席夏佳理同周松崗，一齊出席滙豐呢個活動，周松崗去完ICC慈善跑就過嚟滙豐，認真有心。港交所收購LME就嚟成事，最近仲批股抽水，唔知周松崗仲有冇嘢要向夏佳理偷師呢？
李華華
mailto:[email protected]