上到陸羽飲茶，幾位老友不約而同都談及梁特首山頂大屋僭建一事，駡聲四起。一間大房內坐齊愛國前輩嘅新聞界老總級人馬，以前李子誦必定出席，立法會曾主席及老人大吳康民不時加入呢個飯局嘅，佢地閂埋門唔知有冇討論呢件事呢，恐怕一班老愛國都擰擰頭。
意見如此統一，齊聲一駡，實屬罕見，記得二、三月間，競選激烈之時，我地有狼豬之辯，有人要選狼，話狼夠聰明，做事又勤力，識講嘢，有人要選豬，話豬夠老實，唔會傷害別人，但有人大聲話如果僭建豬當選，會參加十萬人上街遊行抗議。
好嘞好嘞，卒之係隻狼大勝，估唔到依家市面上出現齊心駡狼之聲。陸羽老友突然嘆息點解唔係豬當選㖭，醫生Ｃ話唔係反對僭建，而係頂唔順自己有僭建之人當日竟然義正詞嚴咁指控他人僭建冇誠信，仲要賣口乖：「處理了，就不是僭建。」
算了吧，都是香港人活該有此一劫，鬼叫二三月之時有咁多天真市民、傳媒挺CY，令狼嘅民望拋離，令中央有藉口挺佢進入禮賓府咩。離開陸羽，收到沙田陳太電話，佢話前一晚有一間調查社打電話到屋企，問得好騎呢，第一條問長者生活津貼未能通過，是否立法會議員責任？第二條問梁特首僭建問題會否影響特首民望？第三條問，你係愛國愛港人士吖，中間派吖，還是泛民派？沙田陳太居然識得反問：長者生活津貼過唔到關，政府是否有責任呀？調查員突然回答：「好，問埋呢條啦！」沙田陳太連忙放低電話，因為佢都知道，民意調查問題係一早擬定，唔准增刪嘅，邊度可以臨時話加一條㗎。沙田陳太認為有啲不知名機構混水摸魚，亂咁打電話做民意調查，根本就別有目的，不知為誰服務。
政治氣壓如此低迷，走入置地廣場商場，體驗下商業化聖誕氣氛，精神為之一振。噴水池上臨時搭建咗一個白色雪山，配置咗四架微型纜車，似係「三碌拎」，不少OL與外來遊客在此拍照，外籍美女見到此人造景致，竟然連聲叫cute，美中不足之處就係雪山背後全是Dior裝修圍板，唔通要拚命趕上聖誕前重開？Dior擴充地盤，連在置地廣場經營近30年嘅Ralph Lauren都要讓位，搬去太子大廈，啲奢侈名牌確係獨霸一方。