日聯：走下坡
飛腳降班，計段段走勢應該冇乜球迷估到，9月作客5球大炒浦和紅鑽、10月作客力壓川崎前鋒、11月再作客輕取心跳；令煞科戰作客磐田山葉莊家開1.62倍W仍捧場者眾，最終功敗垂成，相信唔少賭友損手；此地聯賽水準日走下坡，三箭封王打一個佐藤壽人，外援好嘅都會轉去西亞搵油元，優質土炮恨去歐洲。嚟緊淨番個日皇盃，外援散得就散，土炮混戰好難搞；下午悶悶地，波友多刨走進夏日嘅火熱澳職好過啦。
英超：費Sir冇得頂
周末頭場車仔輸畀韋咸好核突，但小弟唔想賴晒接燙手山芋嘅賓帥，呢隊波係迪馬堤奧建立，佢嘅三核季初曾經勇銳無匹；家新帥接手要拆散佢，回到起點，都要畀啲時間磨合。但下半場後段要扭轉劣勢出後備雪到硬晒嘅馬高馬連，又真係摸不着頭腦。車仔老闆阿巴出名冇耐性，賓帥此刻度日如年！上周六尾輪雷丁鬥曼聯打場儍波，一開波入7粒跟住停咗，費Sir 70歲人，見後防唔掂即企喺場邊指揮換人，呢份頭腦同氣魄，喺英超無人能及！西甲仲有一個，將會返英超嘅摩帥。
英冠：開懷鬥攻
嚟緊周中全面停戰，造就上周五、六出名反覆嘅英冠球會放開懷抱鬥攻「大」開正路波，10場波攻入40球；對比密集戰嘅英超，易估好多。近期勢弱嘅原實力分子好似伯明翰、黑池同狼隊都反底，用上「反底」兩字，即個人唔太敢長線追蹤。反而水晶宮換上荷路威揸旗後勢頭更勇，若然下月留得住英格蘭明日之星韋費特沙夏打升班戰，值得盯緊。文：蘋果波神