恭喜恭喜！07年國際中華小姐季軍陳爽，噚日喺海南島三亞同拍拖一年多嘅銀行界金融才子Anthony Leung舉行婚禮，一班好姊妹李亞男、朱璇等都去咗陪嫁，陳爽將會同親友喺三亞玩番幾日，出年1月20日先喺香港再擺酒，佢仲話喺家鄉哈爾濱同意大利影婚紗相㖭。
兼職做無綫主持
噚日李亞男喺微博度上載咗幾張相畀大家分享阿爽結婚嘅喜悅，仲寫住：「阿爽！真的太高興、感動，你找到了幸福！也多謝請我來三亞。」相中見到陳爽同老公Anthony喺沙灘度攬住好溫馨，而朱璇、李亞男同陳爽三個又鬥晒美腿，玩得好開心，李亞男更加放鬆唔理肥唔肥，開懷品嚐地道美食。29歲嘅陳爽拍過《女王辦公室》、《萬凰之王》，不過發展唔理想，一年前轉咗去香港航空做營業及市場部企業銷售經理，但仲有兼職做無綫TVB8嘅主持，佢早前都有客串《衝上雲霄II》做空姐。
撰文：馮仁昭
