祖國金融業認真有特色，於深圳交易所上市嘅浙江火腿生產商「金字火腿」發通告，話計劃透過工商銀行（1398）發行總值2億人民幣嘅「巴瑪典藏發酵火腿組合」理財產品，通告講明產品年息最高有六厘，投資者仲可以拎嚿火腿當收息！
巴馬火腿（Parma Ham）配紅酒就食得多，不過去銀行買火腿就真係未聽過。金字火腿話，「至少經過36個月的窖藏周期，同頂級葡萄酒一樣，堪稱一件有生命力的藝術品。」有得食、最高又有六厘息收，聽落唔錯。
講到咁巴閉，華華都好想買份試食，不過工行私人銀行客戶部話，產品仲未批，即係未有得賣住。如果讀者有勇氣，其實可以上網訂嚿火腿寄來香港，不過以售價9988人仔嘅「巴瑪藝術家黑蹄發酵火腿」為例，網上商店累積評價得兩個，最近一個月更係零成交，似乎會中伏喎！