話咁快又到12月，傳統說法基金會為旗下持貨Mark個靚價，做好張成績表同客戶交代。今年港股暫時升約兩成，如果一早揀啱股份，粉飾櫥窗誘因冇之前咁大。雖然熱錢繼續泊港，內地經濟亦有回穩迹象，但美國財政懸崖死線逼近，民主共和兩黨冇咁易妥協，今個月交易日唔多，但市況肯定Chok爆，戰友們要有心理準備。
近排除咗內房股強勢外，珠寶鐘錶股亦默默起革命，有指去年基數低，令近月銷售有明顯增長。早前推介嘅英皇鐘錶（887），一如預期升至0.93元，8%利潤手到拿來。今日推介同系平靚正嘅英皇娛樂（296），中期純利增長26%至2.3億銀，年度化市盈率5倍唔夠，中期息5.3仙，假設末期派息不變，現價息率高達6厘，手頭淨現金15億銀，相當於市值逾六成，難怪大股東業績後頻頻增持。翻查往績，大股東出手對股價絕對有支持作用，現價1.74元上車，要見2字頭難度不大。
唐牛