求驗客手記：
曼聯漏水費Sir一變即掂

曼聯上周六又做反勝王，仲趁曼城失分，坐穩榜首！喺兩度落後下，全靠領隊費格遜調動得宜，幫防線止血，紅魔作客先至以4:3贏到雷丁。
曼聯開波8分鐘就被雷丁的笠臣簡奴射入，今季聯賽第10次先失波，係英超20支球隊最多。雖然曼聯之後由路爾斯安達臣同朗尼的入波反先2:1，但雷丁分別喺19同23分鐘靠角球攻勢頂入番兩球，曼聯再次落後2:3。紅魔之前喺英超未試過唔夠24分鐘就失3球，難怪費格遜震怒：「我相信今場嘅戰果肯定打破咗某啲紀錄，因為我哋條防線太差，係今季最差！」

儘管朗尼喺30分鐘射入個人今場第2球，幫球隊追成3:3，但費格遜擔心又再輸番轉頭，所以31分鐘就果斷換走1米73高嘅拉菲爾達施華，換入1米94嘅基斯史摩寧。費格遜解釋：「雖然拉菲爾有張黃牌在身，但我唔係擔心佢被趕出場，我哋嗰陣真係要加強防線嘅高度。」
換人見效！曼聯喺34分鐘由尹佩斯再入多球，半場第2次反超前，領先4:3，而且去到換邊後都冇再失波，維持贏4:3完場；今季英超第7次喺先失波下反勝。由於曼城主場同愛華頓踢成1:1，痛失兩分，曼聯現以36分排榜首，領先第2嘅曼城3分，而曼聯喺足智彩嘅奪標賠率，仲熱到得1.52倍㖭。