【將軍澳新都城】現年28歲嘅前港男高鈞賢演藝事業平平，最為觀眾記得莫過於佢同葉翠翠嘅緋聞，佢哋經常被拍到出雙入對，又孖咇情侶檔姿態銀。呢排翠翠唔小心跌倒，背部骨裂留喺屋企，高鈞賢前晚竟然背住翠翠女，新歡係年紀輕輕嘅長髮甜姐兒，短褲內仲着咗呢排hit爆嘅黑絲誘惑，女方全程對高鈞賢照顧妥貼，明顯冧爆。
前晚9點半左右，高鈞賢撇甩翠翠，喺將軍澳新都城商場拖黑絲妹拍拖，佢哋啱啱睇完戲搵嘢食醫肚，兩人最初想食Pizza Hut，但太多人而改去food court嘆平民水餃麪。由於自助形式，高鈞賢坐低搵好位即如大爺般打躉郁都唔郁，黑絲妹做阿四服侍周到，由畀錢、攞食物、甚至拎筷子同匙羹，佢都任勞任怨一腳踢，最後坐低開餐。佢哋排排坐邊食邊傾，周圍食客都冇人認得高鈞賢，食飽後，高鈞賢同新歡前後腳去停車場攞車。
翠翠：等我笑吓佢
高鈞賢噚日大方承認同黑絲妹蜜運中，佢話：「我哋發展中，識咗好耐，早排我傷腳，佢好照顧我。」高鈞賢解釋未有買嘢因為公眾人物身份唔方便，惟有要女友做阿四。對於高鈞賢女，翠翠噚日喺電話回應：「大家係朋友，緋聞係傳啫，等我下次見到要笑吓佢，有着落都唔介紹啲男仔畀我。」
採訪、攝影：朱志聰、梁繼光
