金山軟件（3888）剛出第3季業績，按年計收入升51%至3.65億元人民幣，純利升44%至1.08億元人民幣，每股盈利9.44分，頭三季26.92分，年度化市盈率11倍。按季計則第3季盈利倒退3%，但收入升13%。按季倒退原來係銷售及分銷成本按季急升96%至7856萬元人民幣，主要因為對新推遊戲同產品大做市場推廣活動。
金山近期新發佈遊戲包括《月影傳說》同《聖道傳奇》，分別喺9月19日同10月26日公測上線，即係話呢兩隻Online Game嘅收入要第4季業績先反映，但成本就Book咗喺第3季，可以想像第3季業績肯定會差啲，下一季開始，新Game當前，好戲在後頭，出年好大機會有唔錯增長。
晉佳本身唔打內地Online Game，但點都上網睇吓網友點講兩隻Game，其中《月影傳說》係經典遊戲系列，新推版本口碑唔錯，幾多人話好玩；至於《聖道傳奇》大家就覺得麻麻哋。不過，由於主打嘅《月影傳說》要Keep住畀錢先有得玩落去，所以呢隻先係未來嘅賺錢Game。就咁睇，金山嘅網游業務前景好似不俗。
短線目標6元
除咗網遊業務之外，金山仲有商業軟件同招牌軟件「金山詞霸」，雖然公司執行能力唔算強，但勝在呢部份業務表現穩定，年初至今業績都能夠穩步上揚。
金山仲有一個賣點，就係財政狀況相當穩健，淨現金19億元人民幣，佔市值四成有多，唔計有淨現金，今年市盈率都可能得10倍左右，估值睇嚟都幾吸引。睇住隻網龍（777）上周四、五兩日夾埋升16%，金山軟件有啲落後，睇埋業績，晉佳覺得金山係唔錯嘅選擇。
淨係睇圖，金山股價9月由3.60元升到5元之後，進入兩個月嘅整固期，股價由5元再回吐番去4.40元，然後醞釀回升，走勢幾靚仔。雖然未知市場點樣反映佢份業績，但都值得喺5元樓下搵位買入，短線先睇6元，揸幾個月作中線持有亦無妨。
晉佳
本欄逢周一、三及五刊出