四大代理之一嘅利嘉閣地產，上星期傳出裁減300名人手嘅消息，正當內部人心惶惶之際，呢幾日又傳出利嘉閣嘅負面傳聞。
話說代理界流傳一張由利嘉閣尖沙嘴區一位助理營業董事簽名發出嘅內部通告，下令今個月頭15日開唔到單嘅前線營業員，下半個月就要取消休假；如果經理級別喺呢段時間交唔到30萬數出嚟，都要一樣要罰留堂，下半個月冇得放假！
華華問過熟悉勞工法例嘅朋友，佢話僱員每七日就一定要有一日休息，若果利嘉閣真係咁做，就係違法，若被檢控一經定罪，最高會被罰款五萬銀。華華有見事態嚴重，就打去問一問當事人James，佢話完全冇發過呢份通告，公司亦冇咁嘅安排，睇嚟畀人惡搞喎！咁又係，利嘉閣係第一個企出嚟話會炒人嘅地產代理公司，自然成為眾矢之的。