新地（016）同公益金兩年前喺中環IFC搞跑樓梯慈善比賽，以往跑手只要由地下跑上88樓終點就收工，但今年比賽場地移師咗去九龍站嘅ICC，跑手要由8樓大堂跑上100樓，總共2120級樓梯，較喺IFC要跑多三層。
財爺嗚槍 炳江頒獎
新地聯席主席郭炳聯主持開幕儀式，財爺曾俊華同港交所（388）主席兼公益金董事周松崗都有嚟捧場。雖然佢哋三個都着晒運動衫，但財爺就冇落場跑，只係做槍手，負責鳴笛，而郭炳聯同周松崗就帶頭起步，不過只係由八樓跑上九樓，再敲響個銅鑼做吓樣就算。至於新地另一位聯席主席郭炳江，就大約喺比賽尾段先到現場頒獎。
今年參賽人數唔算多，約百多人，反應唔算熱烈，今次籌款所得係唔會扣除成本，全數捐畀公益金。郭炳聯就話希望下年再搞多次，可以幫手籌款，不過個慈善跑要由公益金決定比賽地點，即係下年唔一定再跑ICC。