今期開始，《小百科》將換上由小弟魯毛丘執筆的專欄，同是打工仔嘅毛丘在此論盡積金百態，有不平事一齊鬧，有筍嘢、着數當然會齊齊分享。
上星期積金局發表研究報告，指強積金收費有下調空間，希望五年內將平均收費由目前1.74%降至1%。只要簡單計算，就知我哋血汗錢點養到一眾受託人肥肥白白。強積金最新總資產達4125億銀，以1.74%計，今年收費承惠72億銀，勿忘記積金規模每月增加，受託人咬住呢舊肥肉又怎捨得放口。
當局與其絞盡腦汁諗計逼受託人減收費，不如盡快解決技術問題，推行積金全自由行。好似買股票咁，市面0.01%佣金又有、3.68蚊一單佣金又有，有銀行更搞五年免佣，客仔可以自由揀股票行，鬥平佣爭客咪係結果囉！
魯毛丘