【本報訊】最近興起的午宴擺酒，因出年盲年不宜嫁娶，準新人趕在今年龍年拉埋天窗，酒樓、酒店婚宴檔期爆滿，令更多人選擇午餐及茶會婚宴，今年午宴擺酒的生意額增長兩成。有酒樓指出，午宴較晚宴慳錢，最多可慳一半，每圍低至4,000元，但人情金額不會減少，新人埋單拉勻，隨時不用補貼，甚至有得賺。
記者：林賽香
設計師Jerry及Renee租用清水灣三育書院的大草坪，邀請200名親友出席午宴婚禮。Renee慨嘆，龍新娘唔易做，「好難訂到場，夜晚擺酒仲好貴」，有見午宴較易訂，收費也相宜，決定在午間行禮兼擺自助餐宴，更落本請一隊樂隊及攝影隊作現場演奏及拍攝，「咁嘅規模，夜晚起碼要30至40萬，家18萬就得」。
年長親友讚「冇咁頻撲」
一對新人認為，午宴的時間充裕，由中午12時至傍晚5時，有更多時間搞娛賓活動，「夜晚擺酒好夜散席，第日親友要返工，我哋趕去度蜜月，好攰。但晏晝擺，聽日可以輕鬆上機」。擺酒慳一筆，一對新人到歐洲蜜月旅行的預算也變得鬆動。
到賀的郭小姐也發覺午宴婚禮越見普遍 ，「今年第三次參加下晝搞嘅婚宴，第一次都會諗人情使唔使畀少啲，但諗諗吓，人情係要同交情掛鈎，今次嘅人情仲多過公價好多」。上年紀的親友也甚為受落，「晏晝搞幾好，冇咁頻撲，但人情冇得少」。
雙方家長均是素食者，全素宴是這婚宴的另一特色，但會否擔心人情打折扣？新郎Jerry說：「冇諗過要親戚幫我哋找數，人情只係心意，多少無拘。」
身兼香港現代管理飲食專業協會會長的新光酒樓集團常務董事總經理胡珠表示，午宴擺酒成新趨勢，過了午市約兩時後入席，「其實一家便宜兩家着，酒樓原本落場，家做埋生意，賺番租金，所以收平啲都冇所謂」。
他透露，個別地區酒樓午宴低至半價，包酒水每圍12人的酒席只需4,000元，即每人平均333元，如果客人給500元人情，新人隨時有得賺。午宴與晚宴同樣有八道菜，但菜式較平價，例如乳豬全體改為乳豬拼盤，蟹鉗改用海鮮卷、生翅改為雞絲翅等。
龍年多嫁娶 午宴多兩成
婚禮顧問歐惠芳指出，今年龍年又是閏年，特別多嫁娶，日子好的晚宴更於一年前被訂爆，令結婚午宴生意多一、兩成，「冇得訂夜晚，多咗人改喺晏晝擺，一來多啲日子揀，又平啲。有啲好日子午宴都爆咗，新人再轉去book（預訂）茶會，一條龍帶旺埋」。
「港女500」的人情風波弄致滿城風雨，婚禮改為午宴或茶會，人情可否「畀少啲」。歐惠芳提醒，人情不是餐券，「公價只係參考，交情深嘅朋友，就算觀禮都畀成千蚊。而且人情要還，今日我請飲，你畀幾多人情，第日你擺酒，我就畀幾多」。