【電視風雲】
【本報訊】亞視奇招百出，繼大搞騎呢爛騷後，又透露聲稱不同階層市民組成的愛港之聲，今天會遊行到亞洲電視總台，力撐「亞視係良心電視台」。有立法會議員質疑這些聲稱自發行動，又是亞視公器私用的伎倆。在網上呼籲參與「撐撐撐，撐亞視」的愛港之聲經常「力排眾議」，早前曾多次舉辦撐國民教育等活動，支持赤化洗腦教育。
記者：翁煜雄 黃曉妍
亞視昨天在大埔總台為節目《感動香港》舉行拜神儀式，出席的高級副總裁葉家寶透露：「聽日（今日）有『愛港之聲』嚟聲援亞視，支持亞視係良心電視台。」被問及這班人士身份，葉家寶聲稱都是香港人：「佢哋係一班嚟自唔同階層、關注香港未來嘅人，佢哋感覺最近香港多咗風風浪浪，有啲正氣需要支持。」
葉家寶稱不清楚遊行人數：「肯定唔止一個人，今次係佢哋發起咗先通知我哋，我哋好開心，香港有好多正義力量，呢個係香港特別嘅地方，包容唔同嘅聲音。」早前有網友發起包圍亞視以示不滿，雖然只有一人參加，但是搞手曾慶光對亞視「愛之深恨之切」，事後獲大批網友支持。
疑曾以剪刀指嚇黃之鋒
若非亞視提及，市民未必知道愛港之聲原來在數天前，已經透過facebook發起這「愛港之聲撐亞視行動」，並提到：「撐、撐、撐；高質電視，要撐。正面聲音，要撐。香港良心，要撐」。愛港之聲呼籲今天下午2時在大埔墟港鐵站集合，再遊行往大埔工業邨亞視總部。
愛港之聲在10月曾於旺角舉辦撐國民教育論壇期間，集會者每遇到反對聲音便以粗口回敬，連學民思潮黃之鋒等人途經時，亦疑遭人以剪刀指嚇。
鮑起靜盼政府表明態度
昨天出席拜神儀式的藝員包括鮑起靜和陳啟泰等，對於近日電視風波，現為亞視和城電效力，食正兩家茶禮的鮑起靜說：「黎明前夕總有黑暗時期，係有亂嘅氣氛，只要政府有明確態度，到時大家唔使再爭拗，亞視有好多監製，問題只係冇機會畀佢哋發揮，我相信只要有呢個機會，佢哋唔會做得比其他人差。」亞視「鎮台之寶」陳啟泰則說：「藝員唯一最大嘅希望，係開多啲好嘅節目。」
立法會議員毛孟靜稱，亞視近日行徑確讓市民「眼都凸埋」，對於有市民撐亞視感到莫名其妙，「真係自發㗎？」但她說市民有表達意見自由。有高登網友亦稱，「支持最直接係開亞視嚟睇，但睇死班愛黨力量都係冇睇亞視」。
