美國蓋洛普（Gallup）做咗一個歷時三年（2009-2011）嘅調查研究，在一百五十個國家，每國訪問一千人，受訪者要回答對五種正面，五種負面嘅情緒有何感覺，例如是否有足夠休息、輕鬆、享受、微笑、擔心、悲愁、緊張、憤怒等等，蓋洛普發現（根據CNN報導），世界上最無感情感覺嘅國家，竟然係富有到極嘅新加坡──失業率1.9%，人均GDP五萬美元，但高達36%嘅新加坡人竟然毫無情緒感覺，或者係喜怒不形於色，於是被稱為世界上最嚴肅嘅國家（the world's most stoic nation），緊隨其後嘅係前蘇聯嘅國家。
新加坡位處熱帶，熱帶人民多數熱情奔放，生性樂觀，例如菲律賓人就係最有情緒嘅國家，蓋洛普調查發現有六成人有情緒反應，點解新加坡人竟與冬天冰封，受困室內，好飲伏特卡嘅前蘇聯國家人民同樣咁冇feel？菲律賓曾係西班牙殖民地，有拉丁習俗傳統，拉丁美洲十個國家在情緒排名位於前列，緊追菲律賓。可惜嘅係，CNN報導冇講到香港嘅情緒指數有幾多，不過一定高過新加坡人啩。
左丁山唔係社會心理學家，唔知道新加坡人點解缺乏情緒情感，但有一個非科學性觀察，就係一個國家嘅人民不能自由決定自己經濟行為時，即使當權者幾咁精英，幾咁仁慈，人民都是不太快樂的。新加坡官員高度廉潔、效率十足，社會工程（social engineering）做得仔細，對人民居住面積、環境、家庭組成，都有不同辦法去影響，久而久之，新加坡人變成順民，對政府政策、計劃，不敢反對，不敢評論，反正佢地知道，政府高官一定叻過佢地，聽話有着數，反對惹麻煩，於是到咗一個不敢主動發怒或大喜若狂嘅狀態，與此同時，因為政府係亞洲最醒，弄得長期經濟發展一片順流，錢愈來愈多，人民仲有乜好呻喎。如此國度，是否理想？經濟學人之EIU調查"Where to be Born 2013"將新加坡排第六位，香港排第十，但頑皮慣、嘈慣嘅香港人，如果來生做新加坡人，會惹上抑鬱病都似。