陸永與唐寧昨日齊齊現身黃埔舉行的親子活動，二人雖曾是戀人，但相處依然融洽，有講有笑齊齊做訪問，記者更提議唐寧的囝囝應與陸永的囡囡對親家，唐寧即笑言：「你個女好靚。」陸永即回應：「佢似我喎，個女都白雪雪。」二人表示分手後很少聯絡，唐寧說：「佢唱歌，我拍劇，好少見到。」
陸永將榮升第二任爸爸，他表示會積極搵錢，問到湊B辛苦，他即笑笑口表示：「好彩唔關我事，湊BB都係頭幾個月辛苦。」唐寧透露囝囝20個月大，尚未開始為他搵學校：「未安排，playgroup都冇上，等佢享受吓做BB先，我身邊啲朋友就替我心急。」問到她會否再追多一個小朋友，她表示：「如果再生，都等囝囝大少少先。」
採訪、攝影：顏英儀