一連六場「顧嘉煇大師經典演唱會」前晚在紅館開鑼，胡楓夫婦、黃淑儀等到場欣賞，全場爆滿。一眾圈中好友林子祥、張學友、鄭少秋、葉麗儀、陳潔靈、凌波、葉振棠等獻唱向煇哥致敬，煇哥指揮一隊由30人組成的大樂隊，奏出《小李飛刀》、《勇敢的中國人》等膾炙人口的組曲後，便接受台下歌迷熱烈掌聲，之後便到台下與太太及孫女同坐睇騷。
壓軸表演的鄭少秋扮占士邦，與性感舞蹈員大跳辣身舞，令顧嘉煇的演唱會瞬即升溫，㷫爆全場。煇哥被好友不停爆料，凌波指他年輕時被好多女仔追住，她笑說：「煇哥好怕醜，識佢幾十年唔知有冇講過40句說話。因為佢作嘅歌，邊個唱紅邊個，所以好多女仔追佢。」
「第一次聽自己作品」
陳潔靈跟葉麗儀合唱後亦向煇哥「詐型」，陳潔靈說：「好傷心，咁多年都冇作過兩個女仔嘅合唱歌。」煇哥爽快承諾會為她作歌。羅嘉良則爆煇哥是宅男，他說：「好佩服煇哥，81歲好似25歲咁有精力，但用潮語形容，煇哥絕對係一個宅男，佢屋企有六部電腦，成日都唔出街，陶醉音樂之中。」
張學友獻唱關正傑的《萬水千山縱橫》掀起整晚高潮，雖然大家不停叫安歌，但學友唱完一首歌便離開。最後眾歌手合唱《獅子山下》，煇哥說：「多謝聽我歌嘅人，之後先再多謝番班歌手啦。我都係第一次聽我自己嘅作品，好值得紀念。」
採訪：胡比
攝影：仇志德