二線內房逐隻郁，揀落後，炒麗豐控股（1125）。麗豐最新NAV 0.65元，現價（0.189元）折讓高達71%。麗豐折讓大，股價喺一年低位打橫行咗成年，啱啱先破咗橫行頂，股價殘係一回事。二則，麗豐呢幾年資產增值好肥仔，到家陣已經過百億銀，將個NAV折讓再拉闊。咪忘記，麗豐家陣喺祖國嘅物業組合，以應佔建築面積計，達1373萬平方呎，當中發展中物業土儲上千萬平方呎，即係話，土地價值仲未釋放。組合係咁意每平方呎增值100蚊計，都講緊額外增值13億銀，而麗豐家陣市值都不過30億銀，繼續肥仔水。呢轉買麗豐，折讓收窄到60%，見0.26元，都講緊要升38%，向上仲有大把收窄空間。
泛海殘爆追落後
泛海集團（129）打橫行咗成年，喺本土地產股當中，非常落後。以集團2013年半年度（9月底止）業績為準，連埋酒店價值浮面，每股NAV高達12蚊，現價講緊幾多？係1.38元。NAV折讓高達89%！不妨離譜啲，將NAV打個四折，到得番4.8元，折讓仍然高達71%。買泛海，博翻半番到2.07元，折讓仍然有83%，價殘博取呢個回報率，一啲都唔過份啩？
錢雋