有味嘢以往真係諗極都唔明，就係啲女士成日話「男人呢，好專心咁埋頭工作嘅時候，就係最有型㗎嘞！」乜呀，今時今日成身都係玩具嘅時候，人人都係multi-tasking㗎喎，點會有人可以同一時間只做一樣嘢咁呆㗎，有的話，型唔型我唔肯定，悶就好肯定呀！
直到最近，終於有報應，當自己喺開會嘅時候好投入咁想話暢所欲言時，眼眉一與會嘅各方人士，唔係單眼望住部手機就係雙手捧住部iPad，耳仔都仲好似係聽緊你講嘢，但身體嘅反應呢，就好似睇緊網上直播咁，好remote囉。情形有啲似明明已經坐咗喺紅館，而台上嘅歌手只係同你十步之遙，但係你隻眼呢，都係不期然咁望住頭頂嗰部大電視，好似人同人之間已經再唔需要eye-contact，眼望眼？好尷尬啫，都係望返個mon舒服啲。
受害嘅肯定唔單止我一個，周不時亦喺facebook見到唔少蜜運中嘅少女/女士們突然發難：「家陣同我食燭光晚餐定同whatsapp食呀！」咪係囉，雌性動物食嘢嘅時候最重要就係講嘢，而你就掛住玩嘢的話就當然會出事啦，其實以往手頭上冇咁多玩具時，男士係比較容易扮「聆聽」，但家陣你手指又狂篤，嘴角又抽搐，真係好難唔識穿你啦，唔怪之得女士們成日舉機自拍兼用鏡頭食嘢都要自己幫自己，因為隔籬嗰個都唔得閒。
專心睇波先夠型?
一身兼幾味唔得人鍾意，最近有個調查就更顯示，原來成日一心多用胡思亂想，快樂指數係會低啲㗎，即是話能夠心無雜念只做一件事嘅時候，就算你做緊嘅嘢係過唔過癮嘅，都會enjoy啲！
真的嗎？我以前肯定唔信，但最近深夜睇波，開始會唔食嘢唔上網唔轉台，專心煲一場波，就算嗰場波愛隊輸定贏都好，賽後都覺得自己做咗一個好稱職嘅球迷！唔知半夢半醒嘅太座深夜望見我，有冇覺得電視機前嗰位儍佬型咗啲呢！