每當遇上市況不明朗，外圍波動時，財經演員向股民的建議，十之八九是炒股唔炒市，記者寫到唔識寫，唔知睇好定睇淡時，炒股不炒市成為必然金句，又可以撐多五個字。股榮無聊用wiser系統統計，過去一年，全港報章雜誌合共有637篇文章用到炒股不/唔炒市，用炒市不炒股的，只有40篇。
炒股唔炒市這句說話，某程度幾矛盾。大家不妨想想，如果個市睇唔透，點解你又睇得出邊啲股份係掂呢，如果揀得出，咁即係你睇得清個市啦。
究竟何謂炒股、可謂炒市呢？股榮角度而言，期指、恒指牛熊證屬投機產品，不當炒市，暫只視盈富基金（2800）及A50（2823）等這類產品為炒市工具，買賣其他股票則屬炒股。其實炒股不炒市如此氾濫，這種港式傳統，與港人鍾情即抽即中獎的性格有關，有求就有供，財經節目上，觀眾打電話問冧把成為必然環節，就算個市幾好或幾差，我都未聽過有人打上去問，師父，我隻盈富潛緊水，好唔好止蝕啊。
MPF應納入盈富基金
歐美股市ETF大行其道，成交甚至超越正股，屬於典型的炒市不炒股。由過去10年港股經驗話你知，除非你碰上大牛市或眼光一流，你炒股跑贏大市的機會少於一半。
統計2003至2012年10年時間，恒指8升2跌，跑贏恒指股份的比例，只有五次超過50%，2008年及2011年遇上跌市，你揀中跑贏大市好股的機會只有27%及36%。今年是體驗基金經理實力的一年，恒生指數年內累積升幅接近20%，跑贏大市的股份僅255隻，佔整體（只計10億以上市值股份）只有三分一，比例是最近10年第二低，僅次08年海嘯股災年。單買盈富，炒市不炒股，你已經立於不敗之地。
另一個炒市勝炒股的地方，是投資者對回報的態度。每年就算市況多惡劣，芸芸股海中，總有數隻是倍升股，但撫心自問，誠如2009年市場有333隻倍升股，你能等到一倍先放手嗎？可能升夠兩成，已經急急腳食糊，然後換錯馬，睇住舊愛越升越有，得不償失。買盈富，你預期有相當回報始套利，不會貿然衝動。
炒市不炒股，回報唔惹少，MPF拒絕納入盈富作為長線投資選擇，絕對是敗筆。
股榮