英超馬不停蹄，老實講，自從上月中睇完阿仙奴反勝熱刺5:2後，一個禮拜幾天捱凍，再未睇到一場入腦嘅好波；既然體力戰主導，今天捧兩支倫敦打吡嘅主隊，受讓下起碼保不敗。
富咸領隊祖爾前仗0:1敗走史篤城後，自嘲輸了畀一支欖球隊，沒錯，打得密識踢爛仔波者，反而唔輸蝕，無謂講乜嘢鑽石陣、菱型陣如何絕妙！近期車仔、阿仙奴呢類技術型球隊頻頻失分，紐卡素打到主力入晒廠大跌watt，所以波癮深者周中捱到近清晨6點，見阿仙奴同愛華頓鬥攻和1:1，唔係太收貨；但卻見領隊雲格笑晒收貨。其實，兵工廠已連續兩周4戰，未來一周連今晚還有兩場（周中仲要遠赴希臘，爭歐聯小組首名避巴塞等列強）；就算兵厚可部份輪換，主力對比賽冇晒新鮮感，威力發揮減弱，尤其辛迪卡索拉已打到謝謝地，呢支名氣倫敦兵今晚迎史雲斯分頭欠奉，小弟作壁上觀。
密集戰見英超多和波、入球少比賽，不過今天重點，先撐另一倫敦球會富咸喺打吡「大」戰熱刺。莫說大球會變動頻繁如車仔，連領隊都換上以前嘅對頭人；細會如富咸，今季亦來個大換血，翻查上季聯賽該會前7位射手，已有6個離隊去也，當然包括今晚跟熱刺重返小屋球場倒戈嘅射手丹普西及迪比利。
富咸換入貝碧托夫同柏歷，攻力依然主場威力猶在，今季主場聯賽3勝1和2負；其中完場前被曼城迪斯高攻破，輸1:2無話可說。但慘負新特蘭1:3早前講過極有疑點，結果後者上周再出負西布朗2:4，可見勤力睇波也有得着。
窄場利富咸，簡單由杜夫交貝碧及柏歷直插敵方心臟，相反對手熱刺近況由加里夫巴利同艾朗連儂以速度帶動，無疑出色，但今戰估計會受制對手窄場打密集；熱刺今季作客失球數字極高，6戰失13球，今戰1.65倍「大」實屬首選，再攻富咸大波膽。
次選，另一佔主場之利嘅韋斯咸力抗車路士，後者整個11月竟然聯賽不勝，老細足球禍害可見。韋斯咸周中鬥領隊大Sam好朋友費Sir嘅曼聯，一開波輸1粒到尾，其中主力安祖卡路爾踢了60多分鐘退下火線，此戰實耗力不多；回到主場踢簡單足球，兩翼快放配卡路爾及路蘭禁區內猛炸頹車，[+1]甚至冷W可取。（下次見報日期：8/12）文：蘋果波神