【電視風雲之老將有火】城電揸弗人王維基（魔童）搞第三間免費電視台，雖然政府仍未發牌，但已掀起電視風雲。七十年代為麗的（亞視前身）打硬仗的資深電視人蕭若元認為香港仍有空間容納新的免費電視台，他非常期待魔童出招。蕭若元還揶揄亞視王征的六不政策：「亞視行緊不戰、不和、不守、不死、不降、不走嘅策略，唔知想點，我為王征荷包着想，我建議亞視早執早着。」
撰文：比華利
七十年代初期，影視發展蓬勃，無綫、麗的和佳視鼎立，激烈競爭下，佳視僅僅生存三年即被砌低。過去30多年，無綫跟亞視均越戰越hea，八十年代高峯期一過，亞視如靈魂出竅，令無綫獨大。亞視近日黃金時段播出的《國際財經視野》、《把酒當歌》、《微播天下》和《周四微．電影特號》更製造收視「四零」慘劇，甚至最近一班高層王征及盛品儒為阻城電王維基爭取發牌而做連串大龍鳳，反成觀眾最佳娛樂。
麗的雙雄打硬仗
想當年麗的時代的資深電視人蕭若元和麥當雄助陣製作的三線劇集，如《大地恩情》、《鱷魚淚》和《浮生六劫》等，套套經典。縱橫娛樂圈逾30年，見盡圈中興衰的蕭若元日前在灣仔辦公室接受專訪時，他除建議政府早日發牌予王維基，為電視圈帶出一番新景象，還有獨大無綫要分拆重組，不思長進的亞視趕快執笠。
蕭若元對半個娘家批評得體無完膚，他狠批說：「亞視過去十年，封小平、劉長樂、查氏年代（亞視股東查懋聲及查懋德兄弟）、蔡衍明到家王征係咁換老細，佢哋抱住乜嘢態度嚟做？係唔打又唔縮，就算蝕咗十幾億，始終轟轟烈烈打過仗，話晒雖敗猶榮，直至王維基申請發牌，亞視怕僅餘廣告都冇埋就出招阻止。」
蕭若元揶揄亞視這消極招式，抄橋自第二次鴉片戰爭兩廣總督葉名琛的「六不」政策，他說：「亞視行緊不戰、不和、不守、不死、不降、不走嘅策略，唔知想點，我為王征荷包着想，我建議亞視早執早着，咁樣做落去根本冇意思，唔會翻到身。」
無綫劇不停重複
蕭若元緬懷亞視風光日子，他細數亞視「回魂」歲月：「遠啲有李兆熊時嘅《大俠霍元甲》、邱德根年代嘅《武則天》，甚至乎林百欣嘅《今日睇真D》同《我和殭屍有個約會》等，近期啲嘅《百萬富翁》同內地劇《還珠格格》，亞視收視都唔錯，係近來不事生產先零收視。唔明點解仲要搞啲選美同台慶，惹人笑柄。就算買外購劇返嚟播，最多只係幾千蚊一集，已經好平，點解仲要滾筒式播完又播？遭觀眾恥笑。」
蕭若元回想當年打江山，下了不少苦功，他說：「為咗炮製一部好嘅劇集，大家好有鬥心，當年麗的台前幕後數埋得900人，製作三線劇，我同麥當雄日日喺公司瞓，博到盡，家啲人捱更抵夜就呻辛苦。」
鬧完亞視，蕭若元也勁彈獨大的無綫，他說：「對手太弱佢先可以獨大，無綫整個架構好有問題，首先佢對員工太刻薄，小生花旦人工奀，一線都係幾千蚊一集，所以一旦放佢哋返內地拍劇，紅嘅十幾萬人仔一集，我係鄭嘉穎都拍到唔願返嚟。」他又狠批無綫劇集濫芋充數，就算偷橋，也應以日劇和美劇做學習目標，對於無綫劇集屢現穿崩出錯，蕭若元說：「港劇恃住80年代領導至今，故步自封，梁家樹同曾勵珍幾老至得㗎，佢哋不停玩重複。」
叮囑魔童闖新局
無綫壟斷巿場，硬要藝人歌手不准亮相別家電視台，蕭若元直斥：「呢啲就係佢嘅罪行，依外國法例，如果有公司壟斷巿場，就要將佢分拆再重組。無綫應分拆變三個台，唔准獨立擁有藝人，三個台獨立為政，互相競爭，有競爭先有進步。」
至於今次挑起電視大戰的魔童，蕭若元忠告他說：「王維基係商業奇才，會唔依常規出牌，佢搞電視，香港一定出現新面貌、新刺激。」據知魔童曾向蕭若元取經，他說：「我同佢講要擊敗無綫，切忌翻dup佢嘅嘢，亦唔好用舊有無綫班底打佢哋，呢啲人只會用番無綫思維。睇番亞視時代，佢哋用蔡和平、周梁淑怡同韋家輝等都未成功過。」
集體回憶：
《大地恩情》1980年
九斤哥劉志榮的堅毅精神，曾以狂風掃落葉姿態掃低無綫。
《大俠霍元甲》1981年
文武皆宜的黃元申，演活了霍元甲以武德服人的大師風範。
《今日睇真D》90年代
由大姐明擔大旗的《今日睇真D》逼得無綫要以《城市追擊》對撼。
《百萬富翁》2001年
陳啟泰主持的《百萬富翁》，曾帶起一片問答遊戲熱潮。
《我和殭屍有個約會》系列
由尹天照扮演的殭屍況天佑，真有不死身，長拍長有。
