【隔牆對論】
一台獨大45年，無綫電視似乎看不起城市電訊這新競爭者，但又誓要阻止免費電視牌照由二變五。電視廣播有限公司總經理李寶安表示，電視台數目增加，只會攤薄廣告收入，揶揄城電王維基搞收費電視無人睇。
觀眾不滿無綫霸權、劇集沒創意、遊戲節目低俗，「霸主」自我感覺良好回應說：「我最憎低俗」。
記：《蘋果》記者 李：李寶安
政府早於1998年公佈開放免費電視市場政策，2009年底，三間機構申請牌照，當局2011年原則上同意發牌，無綫最近突然發難反對。
記：無綫反對理據何在？
李：多咗啲電視台係攤薄咗，唔會將個餅加大。因為電視係受高度規管嘅，一個鐘只可賣10分鐘廣告，唔可以賣宗教廣告，政治、殯儀廣告唔得㗎。發新牌頂籠一個，如果day one知可能二變五，一早就有強烈反應啦！
政府發新牌有三個scenario，A就開放自由市場，但要減少監管。B，繼續規管，但牌嘅數目都要規管，仲要解釋點解有咁多個。僧多粥少就用評選機制；如果TVB唔得嘅，我願賭服輸。C係混合式，要高度規管，但牌嘅數目又要多。C最唔好，第一年有競爭，大家鬥到飛起，但跟住十年八載就半死不活，直至邊個唔得。如果唔夠經費，大家咪cut cost囉。我覺得係違反公眾利益，一定會司法覆核。
等於你家入去一個商場做生意，開廣東菜，入去時兩間。我哋裝修好多錢，提供好多服務畀顧客。但業主唔會一定永遠兩間，但唔會忽然間由兩間變五間，轉變咁犀利？
城市電訊、有線、電盈三間潛在競爭者，城電王維基總是無綫和亞視高層冷嘲熱諷對象，似已成兩台假想敵。
記：三間潛在新競爭者，哪一間對TVB最大威脅？
李：最好經驗嘅，梗係有線啦，跟住就now（電盈）。最差嗰間梗係城市電訊，唔使講，睇觀眾（人數）已知啦；佢由03年做（收費電視）到家，有邊個識得佢啲收費電視呢？
王維基都係拍劇集啫，我又聽唔到佢有啲另類嘅東西畀觀眾喎。你有冇幫襯城電嘅收費電視？你有睇過咩？點解佢忽然間咁叻、咁神勇呢？佢呢頭批評TVB，嗰頭就攞TVB啲人，仲吹噓啲人喺TVB做啲咩好嘢喎！」
無綫被詬病零創意，抄襲當飯食。《蝸居》變《缺宅男女》；日劇《救命病棟24時》變《On Call 36小時》。新節目《走過烽火大地》涉誤導遭踢爆，主持人沒有去過宣傳提及的伊拉克、阿富汗。遊戲節目十年如一日，柴哇哇掟蛋糕，被嘲品味低俗。
記：經常抄襲，大台的創意去了哪裏？
李：我哋唔可以用抄字，大家互相影響，一定會有嘅。我成日都叫啲同事，不如去買小說返嚟，例如西班牙、蘇聯、日本小說，攞嚟改，但啲同事都唔鍾意嘅，佢哋鍾意自己創作，我覺得佢哋唔鍾意抄。但佢潛意識中會唔會受到某啲嘢感染，覺得啲嘢好，帶入咗嚟自己嘅創作呢？呢個我唔敢講，可能會有。家都改善緊啦，選視帝、視后都有創意吖，搵市民投票。《烽》幾好睇吖，冇得扮㗎，黎巴嫩點扮？
記：可有想過改善低俗節目？
李：我係最憎低俗嘅，我話畀你聽，我自己都好憎低俗嘅。我唔能夠話《獎門人》、《美女廚房》低俗，但某啲part將啲嘢掟嚟掟去，我自己都唔係咁鍾意睇，to be honest。《獎門人》都可以做得高尚啲㗎，可以做《高級獎門人》，唔係一定要將啲嘢掟嚟掟去㗎。（已經掟咗十幾年喇喎！）咁咪掟少啲囉，哈哈！」
無綫新聞曾有至高無上公信力，誇張點說，當年若葉雅媛、魏綺珊發神經，報道香港發生七級地震，港人或會相信。今日，它淪為CCTVB，11月28日六點半新聞頭條，竟是亞視報案告王維基偷文件，特首僭建屈居第二條。
記：如何回應被諷為CCTVB？
李：我哋新聞係冇立場嘅，非常公正，非常持平嘅。睇番好多research，無綫新聞係公信力最高嘅新聞頻道。作為觀眾，如果亞視講佢（王）係盜竊咗佢嘅嘢，佢又真係去報咗警，佢又投訴有前公務員做唔恰當嘅工作，呢個絕對係新聞！
梁振英僭建就講咗好耐啦，頭唔頭條係新聞部決定囉，編輯自主。我點會得閒畀signal吖。
採訪：翁煜雄 雷子樂 白琳
mailto:[email protected]