李思捷的緋聞女友馮鎵瀠（Naomi）噚日朝早素顏look現身天光道嘅天光道駕駛考試中心，原來佢靜靜雞去考輕型貨車牌，雖然撞正天公不造美，落住細雨，好彩冇影響佢嘅心情，佢喺van仔上同考牌官有講有笑，冇幾耐睇住佢揸架車轉嚟轉去，睇嚟佢好似順利咁完成第一部份嘅泊位考試，跟住佢揸住架van仔出去考路試。大約過咗十零分鐘，Naomi好定咁揸住㗎車返嚟，落車同教車師傅傾咗陣，跟住同考牌官入咗辦事處，之後Naomi揸住張紙出嚟，再行埋教車師傅嗰邊指手劃腳傾咗一輪，再坐師傅嘅車離開。
出年再考自動波
馮仁昭噚日打電話畀Naomi問佢考牌結果？佢大呻：「肥佬咗，我一開車，考官就踩咗吓煞車腳掣，我心都怯一怯，去到斜路停車又死火，掉頭我又撞鐵欄，考牌官仲叫我落車睇。」Naomi話舊年報考後，已經學咗55個鐘，今次肥佬好大打擊：「我諗住改番自動波，家排期最快要出年先考得。」若成功考牌，Naomi話一定會買車：「我會叫男友送，因佢成日飲酒，我可以做佢司機。」
Naomi喺大前年同徐淑敏老公黃浩，仲有商台DJ細So現任老婆阿Wing兩姊妹喺台灣夜蒲迷幻派對相流出，有指黃浩狂阿Wing兩姊妹，對於黃浩被徐濠縈貼相上網，是非不絕，Naomi話：「我打過畀黃浩，但佢冇聽電話，希望是非快啲結束。」
撰文：馮仁昭