我以前做過物業管理，都明白實會遇到有人投訴，其實都冇乜辦法，香港人係咁㗎啦，但你為咗份工，冇法啦，頂硬上！
你咪當佢哋「發噏瘋」囉，最好打啲官腔，圖滑啲就得㗎啦。佢哋其實講嚟講去，都係想人重視佢，你同佢講多啲講完等於冇講嘅嘢，冇乜point、冇重點都得㗎，浪費少少時間招呼吓佢，佢就會好滿足咁離開，千祈咪同佢頂、同佢撐。
我以前試過有住戶投訴見到有鬼飄入屋，叫我哋搵人打齋超渡，如果唔係就有法律行動咁話。我哋都冇晒辦法，唔通真係搵法師打堂齋咩？我哋都係扮晒死晒狗、仲開晒口話好驚收律師信㗎，又話埋我哋都有同事都見到有鬼飄過，仲好驚㖭，佢見到你同佢同一陣線，就會對你好好多，最後咪不了了之囉。
做我哋呢行，最緊要識得將自己抽離，見到客就要扮晒熱心咁款，但一見唔到就即刻忙住做公司啲report，唔好再諗個客嘞，太上心咪盞自己辛苦。
如果得閒嘅話，咪送吓啲嘢食畀班客囉，我當年啲經理、阿頭成日話，十個投訴的人，十個都鍾意貪小便宜。
P.J.
（摘自香港討論區）
本欄園地公開，歡迎各界來信，以450字為限，
請電郵至mailto:[email protected]，
註明《家》樓民講場，請留聯絡電話。編輯保留文章的刪減權。