【電視風雲之期待變天】「知否世事常變，變幻原是永恆……」77年電視劇《家變》推出同一年，無綫爆發了一場真正家變。周梁淑怡偕劉天賜等六大部門巨頭由無綫跳槽佳視，掀起一場電視界龍爭虎鬥。雖然革命未成功，佳視便因財困倒閉，但卻成功造就一班幕前幕後精英。今日，王維基欲再起風雲，身為當年革命先驅的佳視六君子成員劉天賜大表支持：「無綫同亞視已經做到呢個行業殘咗，係時候要洗一洗牌。」
撰文：戴彩煥
電視行業本來就應該汰弱留強，百花齊放，可惜多年來有人hea住做，有人將價就貨去做，到近年有人一腔熱誠想瞓身去做卻沒機會做。城電的王維基等足三年的新免費電視牌照至今仍未到手，令他進退兩難。
「王維基有搵我傾過兩次，我簽咗名支持佢，我話有人肯投資新電視台係好事。無綫同亞視已經做到呢個行業殘咗，係時候要洗一洗牌。無綫每年台慶先整一、兩套好嘢出嚟，好似過時過節就整一、兩餐好嘢你食，平時就鹹魚青菜啦。」曾是電視業革命先驅的劉天賜，日前接受本報專訪時有感而發。
佳視埋計時炸彈
人稱賜官的劉天賜，70年代跟鄧偉雄掌管無綫編劇組，77年偕周梁淑怡等六大部門巨頭跳槽佳藝電視，掀起了一場世紀電視大戰，周梁和賜官等亦因而獲封佳視六君子。
談到當年家變，賜官記憶猶新：「當年無綫總經理余經緯喺印度食錯嘢，搞到變形蟲入血死咗，利孝和（當年董事局主席）就升咗工程部經理羅仲炳做總經理，覺得佢貢獻最大，發射站同微波傳送，甚至一粒螺絲都自己落手落腳做，梁淑怡梗唔高興啦，所以咪俾林秀峰撬咗去佳視。」
佳視75年開台，首將金庸的《射鵰英雄傳》和《神鵰俠侶》等武俠小說改編成電視劇，開創電視先河。但佳視為取得電視牌照，就向政府承諾每晚9至11時播教育節目，這亦變成計時炸彈。賜官謂：「呢樣嘢害死佳視，邊有人睇？剩低嘅黃金時間又可以搵幾多錢？開台兩年唔掂，佳視搵咗林秀峰入股，梁淑怡班馬過去，葉潔馨負責導演、我負責編劇、盧國沾負責宣傳，宣傳部成組人走晒，林旭華做公關經理，石少鳴做買片，除咗營業部全台撬晒，無綫真係震。我辭職時羅仲炳仲叫我唔好撬晒班編劇。」
佳視高薪挖角，無綫亦加薪留人，皆大歡喜，但亦有人被無綫諸多留難，賜官說：「無綫要石少鳴面壁唔畀走，搵間房畀佢坐，日日朝九晚五，冇電話冇秘書，坐到合約完至畀走，鍾景輝過麗的（亞視前身）都試過。」
究竟周梁當時撬走了幾多人？賜官說：「最早佳視得200人，但周梁過到去，就去到800人，連位都唔夠坐。不過馮淬帆同李沛權都唔鍾意周梁，所以周梁一過到去，佢哋又返無綫。」
70年代無綫、麗的、佳視、商台和港台都位於廣播道，因此廣播道又稱五台山，那時也是電視發展最蓬勃的時候。可惜78年8月，佳視因財困倒閉，開台僅三年便玩完。
籲電視加入新血
時至今日，王維基瞓身投資新免費電視台，可惜等足三年政府仍未發牌，無綫、亞視更聯手力阻發牌。賜官表示：「多隻香爐多隻鬼，亞視受嘅壓力最大，所以佢哋反抗都最大。有競爭先有進步，可以令呢個事業更加蓬勃。等於佳視嗰時，三個台爭人，大家都出錢請人，各類訓練班都多的，有勁敵在前，你功夫差啲都死。好似我哋《講東講西》（港台節目）都有個招才計劃搵接班人，唔好成日都係班老鬼，家無綫幕後嚟嚟去去都係梁家樹、曾勵珍呢啲老鬼，佢哋始終會老會死㗎嘛。」
無綫早前表示過去15年電視廣告收入沒增長，賜官反駁指：「廣州、深圳用幾億買無綫節目播，網站又有錢收，藝員又有抽佣，做慈善節目又收幾百萬，呢啲又冇講，我冇話你講大話，但你隱瞞咗大部份收益唔講。講到自己咁慘，不如執咗佢啦。至於亞視就俾港府害死，要佢投資幾億搞數碼電視，家嗰幾億點返嚟？電視生意唔係買今日嘅嘢，係買將來嘅嘢，所有客戶都要睇你個台嘅節目穩唔穩定，亞視咪就係咁死囉。」
笑王征搞衰亞視
亞視一直堅稱收視六四開，賜官失笑說：「當年麗的老闆邱德根覺得自己畀錢出嚟仲要俾人踩，於是唔加入大家共同採用嘅收視調查公司，自己搵人做，做做吓覺得搵人做嘥錢，就叫員工打電話，人哋一講無綫就收線，或者打畀親友問睇緊邊個台，人哋話『睇緊你哋個台呀！』佢哋就話『啊，咁就好啦。』成為全行笑柄。你做咗都係廢，因為投資廣告呢個聯會唔會用你呢個數字去經營。王征你日日喺電視台唱有幾百萬觀眾都冇用，咪一樣冇廣告！佢諗埋晒啲嘢俾人笑，香港良心喎，淨係講江澤民死訊都笑死人啦，點良心呀？」
集體回憶：
劉天賜73年演出處境劇《73》，與當年花名「電池珍」的曾勵珍合作。
77年無綫播映汪明荃主演的《家變》，同年無綫亦爆發真正家變。
佳視首將金庸《射鵰英雄傳》拍成電視劇，捧紅飾演郭靖和黃蓉的白彪和米雪。
羅樂林76年在佳視的《神鵰俠侶》中與李通明分別演楊過與小龍女。
佳視倒閉後，麗的起用佳視成人節目《哈囉夜歸人》原班人馬再做該節目。
