徐淑敏老公黃浩最近聲稱有班藝人喺佢間食肆度捲煙草，但冇開到名搞到人人都係得個估字。其實有藝人涉毒都唔係新聞嚟，不過近年因為吸毒而自毀前程嘅，就一定係蘇永康。
話說當年康仔憑一首《越吻越傷心》紅遍中港台，02年仲喺紅館開個唱，點知開騷前一個月，就喺台北瀨嘢。02年6月8日清晨，康仔去台北「TeXound」酒吧狂歡，同場仲有安雅、當地DJ、藝人同模特兒。其間台警突擊搜查，發現康仔伏喺梳化，褲頭鬆脫，仲有包嘢跌落地，康仔想執但俾台警踩實，佢因涉嫌藏有搖頭丸被扣查。安雅仲離譜，驗尿時企圖用水換尿，結果當然被識穿。康仔最終被判服食二級毒品MDMA罪成，喺台灣勒戒11日後獲釋，形象受損，所以話毒品害人不淺。
撰文：阿Wow
