【隔牆對論】
有電訊魔童之稱的城市電訊主席王維基，手頭上有50億銀彈，要在免費電視市場起革命，有信心令看電視的觀眾上升，從而令整體電視廣告開支增加。魔童揚言創意就是不怕抄襲，大台抄襲，才會令自己有動力去創新。兩個免費電視台的新聞部嚴重赤化，王維基坦言不是主打新聞，但會確保編輯自主。
記：《蘋果》記者 王：王維基
城市電訊苦等三年，政府對批發新免費電視牌議而未決。兩個電視台最近更不斷施壓，先有亞視到政總炮製爛騷；再有老大哥無綫出手，聲稱本地廣告市場十年無實際增長，市場難容納五個免費電視台。
記：無綫稱免費電視牌照突然由二變五，有違他們的合理期望，這說法是否合理？
王：政府喺98年電視政策檢討文件入面，無綫電視係支持廢除專營權費，每年慳咗兩億，轉做數碼廣播同其他方面投資。佢哋當時完全支持開放廣播同電訊網絡。我諗作為一個生意人，係有責任清楚認識市場同政策。一個幾百萬年薪嘅CEO，你自己有呢個責任，對個政策，應該好清楚：政策從來都話係冇限量發牌喎。
無綫舊年賺15億，今年上半年賺8.5億，即係全年會（估計）賺17億，係多過一成增長。係一台獨大，佢一間公司賺嘅錢，多過晒香港所有報紙、雜誌、電台加起來嘅利潤。就當係餐廳，如果多幾間餐廳，可能出街食飯嘅人會多咗。有廣告人話我聽，如果多啲電視台，公司放落去賣廣告嘅開支係會多啲喎。點解廣告商家唔全部錢放晒去無綫？因為佢哋收視由過去40點變到家得20點，即係75％嘅人冇睇你個台。香港電視台牌照係不設上限，完全唔需要研究要幾多個。香港係奉行自由經濟、崇尚自由競爭。如果任何人想喺計劃經濟吓做生意，佢應該去北韓或者新加坡。
城電搞收費電視有近十年歷史，但口碑跟有線電視和now相比，輸足九條街。無綫李寶安也揶揄，王一邊批評無綫沒創意，但卻又只懂向無綫挖角。
記：以你對收費電視台的往績，觀眾為何要對你有信心？
王：我哋從來冇講過大力做收費電視。我哋啱啱起步，唔可能做咗9個月就好過人哋做咗45年。做師奶劇，冇可能做得好過佢。我哋會做新嘗試，例如做香港第一套歌舞音樂連續劇，搵雷頌德作曲。（挖角問題）咁一隻豹，放喺動物園係唔會識跑；但放佢入野外，佢可以飛馳。我哋呢邊，係個好自由創作空間。
無綫創意乏善足陳，但抄襲卻是大台強項；友台每有好節目，無綫即開動抄襲機器，大台財雄勢大、明星輩出，往往「抄出彩虹」。
記：可以如何對抗無綫的強大抄襲機器？
王：創意係永遠唔怕畀人抄。你抄我，係推動我成個團隊去做新嘢嘅動力。我至驚你唔抄！我哋為咗逼真，拍上市公司開會戲，係去IFC租個海景office，7.5萬元一日，現場實拍，係電影效果。你抄？你點抄呀？
王維基短暫入主亞視期間，曾許下不做中央十台的豪情壯語。經營免費電視，王維基只將兩成資源放在新聞。
記：公眾對新電視台有訴求，除了對劇集有要求，某程度上也因不滿河蟹的新聞部。城電的新聞，日後會否是是但但？
王：我哋做咗十年新聞，我從冇干預過新聞部，只要求如實報道。有線同now放好多資源喺新聞，需唔需要三個新牌仔都淨係做新聞呢？我可以好肯定講，我唔係一個可以俾人河蟹嘅人。
我可以承諾，唔會指點專業新聞從業員點做新聞。例如當日國民教育，好多人去到（政總），我睇見某一個台，下午係放到第三、四條；如果問我，我唔會咁做囉。唔係有乜政治立場，只係要選取香港人當日最關心咩嘢。
記：一旦有五個台，五年後會否汰弱留強？
王：五年後，香港九成電視，都可能係connect tv，駁到上網，可以睇到動新聞、「司徒夾帶」嗰啲YouTube、內地網站電視劇、韓劇、日劇，對手唔係三個新牌加兩個舊牌，對手其實係日本人、泰國人、印度人。最近我見過一個內地製作人，佢話點解用我哋香港人，因為香港人cheap，收得平呀，唔係香港人勁呀！內地有知名度嘅演員，拍電視劇收20萬到80萬一集，香港人，最貴只係收12至13萬。呢十幾年，成個行業，係跌晒落去㗎啦。
採訪：翁煜雄 雷子樂 白琳
mailto:[email protected]