【電視風雲之三台亂局】近期電視行業再起風雲，無綫、亞視及王維基都就增發新免費電視台牌照出盡法寶，奸計、詭計、騎呢招、笑料樣樣齊，比電視劇更有娛樂性。正為王維基拍劇的鵬哥盧海鵬，先後效力無綫、亞視，要試咪鬧爆這等醜態，捨鵬哥其誰！不過鬧還鬧，鵬哥絕不像某電視台高層公開爆粗那樣失禮。
撰文：羅美倫
現年71歲的鵬哥在73年無綫藝員訓練班畢業，先後在本港兩間免費電視台工作，因年紀漸大免辛苦，少拍劇集轉拍電影，直至去年王維基的城市電訊染指電視行業，鵬哥才再拍劇，現除為舞台劇《蝦仔爹哋2》排戲外，仍要為城電的《開腦儆探》開工，不過鵬哥說：「唔算辛苦，我訂合約時講明每組戲唔可以拍超過八小時，所以唔覺得辛苦，應付得嚟，酬勞仲要好幾倍。」
說到辛苦，鵬哥當年跟不少電視台紅人一樣吃盡苦頭，最辛苦試過直踩幾日幾夜冇得瞓，病了還要繼續捱：「當年喺無綫拍《金裝四大才子》演太師，我駕電單車翻車成身損晒，照計唔開得工，但第二日仲要開外景，場戲講我要跪一日求皇帝出嚟，我對腳真係唔跪得，夾硬要搵個箱坐住，咁都要開工。」
製作變生產成品
不過鵬哥明白制度就是如此，惟有頂硬上：「特別係上市之後，製作變成生產成品，限住幾多製作費、幾多時間、幾多人完成然後擺埋再做第二個，完全唔係為戲劇，早年拍劇唔需要顧慮收視率、題材，導演、監製鍾意拍乜就拍乜，角色邊個適合就搵邊個，後期人才唔夠，老角求其搵後生黐鬚做，唉……就係為咗生產，八十年代之後就變質，不過鬼叫自己鍾意呢行咩，惟有自己將就。」
現在鵬哥工作講求安逸，因不想捱壞身體冇得玩：「睇到好多老藝員分分鐘捱到病咗，病咗好番都難復元，趁家仲行得食得講得唱得嗌得記性記得，無謂整禍自己，淨係一個記性唔得已經唔使撈，老咗唔一定退休，可以舒服啲、將就啲咪撈囉。」
雖然少做電視台工作，但鵬哥心繫電視行業，對兩台的製作瞭如指掌，當然，以今時今日的電視節目水準，鵬哥跟其他觀眾一樣，彈多於讚：「不過亞視都冇劇集，都冇嘢好睇，成日都睇住佢嗰啲好似上堂教書咁樣，一個人喺度寫幾個字，嗰個《我要做特首》呀，講到今時今日仲係咁，噚日又睇到話反對新免費電視，又係上堂咁講，唉……呢啲節目點吸引人至得㗎！只係做畀自己老細睇啫。無綫都唔係差，但都係因為俾人挖角，家睇佢都想發憤圖強省靚個招牌。」所以鵬哥認為發新牌是好事，令無綫知道有競爭，做好節目。
無綫獨大不公平
無綫一台獨大多年，造成不少不公平現象，鵬哥直言：「一台獨大，對藝員嚟講條件點苛刻你都要撈，都冇得走，唔係幾好，好似澳門咁，長期俾何鴻燊壟斷晒啲賭牌，一開放幾好呀，何鴻燊都要送叉燒飯啦！」曾是亞視台柱的他，也肉緊亞視的不濟：「亞視自從成個製作部取消已冇乜嘢搞，一個台冇戲劇製作，想製作乜呢？得個長期做開嘅跳舞唱歌比賽延續，就算有新嘢《娛樂CIA》，但都係外邊包拍，一個電視台唔多元化，點吸引到人。」
亞視長期積弱，跟管理層經常轉換不無關係，對於新的投資者王征跳騎呢舞來表達亞視訴求，鵬哥有何看法？他笑笑說：「呢啲唔知佢喇，突然間癲起上嚟，家仲搞到話人偷佢啲秘密材料呢樣嗰樣，人哋做十零日CEO之嘛，偷得你幾多嘢至得㗎，真奇怪，乘機搞到人哋出唔到牌為止啫。」
雖然鬧還鬧，但鵬哥在訪問過程中未曾爆過一句粗口，他最出名就是試咪，那豈不是輸給在電視直播中爆出「眾所X知」大笑話的亞視高層盛品儒？鵬哥笑言：「佢噏錯啫，但噏錯就死啦咁大個人，我哋做《蝦仔爹哋》都會噏錯，我哋好檢點㗎！哈哈……我平時就粗口，出街就直頭冇粗口！」
扮嘢最忌傷害人
跟扮嘢能手鵬哥談到「福祿壽」阮兆祥、李思捷與王祖藍的扮嘢功夫，他大讚不錯，慨嘆這類人太少，並解釋箇中原因：「自從試過有人扮嘢俾人打後就沉寂，除咗我去亞視亂咁扮，我扮嘢有界線唔傷害到人，冇俾人鬧過，羅文只係講笑話要接佢律師信，仲同我同台扮，扮嘢只係想人睇得過癮，譬如要我扮陳振聰，扮佢一定要醜化，但傷及到人哋嘅經歷、形象就唔好扮喇，扮木村唔同，日本仔，鬼知咩，我扮孫明揚，佢都同我講佢老婆都認錯。」原來福祿壽曾邀鵬哥返無綫扮嘢，但因他替城電拍劇，無綫返不得，就是因為電視業的畸形生態，觀眾才沒眼福呢。
集體回憶：
鵬哥當年拍無綫《金裝四大才子》時要帶傷上陣。
鵬哥與廖偉雄扮的「撻成一塊」，可謂經典扮嘢片段。
鵬哥扮羅文入型入格，曾被羅文笑言要發律師信告他。
鵬哥過檔亞視主演《香港亂噏》都以扮嘢為主，曾引來一陣話題。
