郭晉安同陳敏之噚日喺將軍澳電視廣播城出席無綫新劇《法網囂雄》拜神，劇中幾個演員越拍越鬼馬，單立文仲抵死到喺微博擺張相，係用汽球整咗個假人扮曹永廉，陳敏之色狼上身玩揸波，十分搞笑。
安仔唔夠祥仔鬥
安仔話其中有場戲要同曹永廉、單立文同李思捷半裸上身着底褲，所以呢排都要做吓sit up，到時都會靠化妝效果幫手。
安仔話後日去馬來西亞出席電視頒獎禮，因當地播緊《東西宮略》而信心十足，但都怕鬥唔過黎耀祥嘅《大太監》，始終喜劇演員冇咁着數。敏之話戲中會同安仔鬥氣，亦都有咀戲；有指佢唔滿意冇份提名爭獎，敏之話冇不滿，只係冇人通知要出席，加上又冇提名：「演員做好套劇後都想被人肯定，我當然會唔開心，不過都係唔開心咗三個鐘，其實冇乜失望，今年都係得一套劇播，惟有明年努力。」
撰文：馮仁昭