陳可辛（Peter）前日50歲生日，另一半吳君如前晚搞慶生派對，圈中人緣甚廣的Peter獲影帝張學友、曾志偉、張家輝、梁家輝，好友金城武及邱淑貞（豆斗）等到賀，君如更笑言批准鹹濕陳可辛搵金雞。
陳可辛前晚在中環慶祝50歲生日，到賀的包括張學友、梁家輝、張家輝、曾志偉、古天樂、邱淑貞與老公，李嘉欣與傷腳撐枴杖的老公許晉亨、柏安妮與老公等。早前被傳偷嗒嚴淑明的君如胞弟君祥，前晚則與黑絲女王江美儀恩愛出現，眾星high爆在台上高歌。
豆斗自爆唔再生
吳君如與女兒陳是知及父母等晚上7時許到達，君如說：「食餐飯啫，上次轉number已經搞咗一次，今次再轉number所以再搞，囡囡應該畫咗張咭做禮物。」傳懷孕的邱淑貞被問是否有喜？她說：「嗰啲唔係真，唔好信。」問會否再努力？她坦言不會了。
至晚上11時許，君如兩個菲傭先帶囡囡及禮物離開，眾星玩至凌晨，各人醉意甚濃，鄭丹瑞透露張家輝、梁家輝及志偉等攬住在台上唱歌；梁家輝離開時有點語無倫次，問到他憑《寒戰》入圍亞太影展，但郭富城卻無份角逐，他笑說：「梗係啦，有我喺度，佢仲後生，要再努力。」志偉離開時難得清醒，原來君如一早要求他不要再醉及錯過開心的時刻，但張家輝不忘寸志偉：「佢玩開詠春，平時橫多，今次好彩係直。」
金城武抽空到賀
此外，君如昨日在尖沙嘴出席慈善活動，她表示前晚請了80位朋友及家人，更批准陳可辛做大丈夫：「志偉爆佢好鹹濕，今次我送佢一個特別服務，批准佢搵金雞。」
君如表示前晚唱了一首英文歌，但入錯key要學友陪唱，張家輝則扮學友唱歌。君如稱囡囡玩得太夜沒有返學，並指陳可辛現在見個女似見女王，又擔心見不到個女嫁都會喊。吳君祥前晚上載一張與金城武的合照，原來他亦有抽空到賀。
採訪：譚倩宜、張俊銘
攝影：陳志嵐
