新世界發展（017）創辦人鄭裕彤入院兩個半月，大家都好緊張佢嘅情況，同系周大福（1929）噚日突然宣佈彤叔連非執董都唔做，只做名譽主席，唔通彤叔病情有變？好彩周大福同日舉行業績會，傳媒唔使撲去中環新世界大廈等彤叔大仔鄭家純問個究竟。
純官：同入院冇關
純官對熊貓眼明顯冇早一個月咁嚴重，不停話「冇事，彤叔好好！」佢解釋，彤叔早於今年4、5月已經想辭任周大福非執董，辭職同入院冇關，話晒彤叔已經退休，真係唔想成日走去開會咁辛苦，想樂得清閒咁話。咁彤叔家點呢？純官就講來講去都係嗰句：「總之情況幾好，多謝大家關心！」
唔做新世界同周大福董事後，彤叔仲係利福（1212）、信德（242）同澳博（880）非執董，亦係萬邦（158）董事，唔知幾時辭埋呢？