稱政壇技安嘅食物及衞生局前局長周一嶽，噚日去咗中大崇基學院畢業禮，有線新聞小花黃曉瑩都係畢業生之一，喺台下聽「歌神」演講。周一嶽對教畢業生做乜都要有建設性，睇埋對方利益，唔好叫人做啲冇可能做到嘅嘢，就算幾大聲、幾野蠻都冇用；又話要諗吓你可以為社會做啲乜，反對同投訴係冇用㗎，真係甘迺迪上身。
佢又話後生做實習醫科生時，三年住喺醫院宿舍，每晚on call，好想同管理層投訴工作壓力大，不過投訴都冇用，唔係你做仲有邊個做喎！ 噚日有記者問佢間屋僭建問題，豪宅個窗幾時還原？佢話交咗畀專業人員搞，已向屋宇署入圖則成個月，不過唔知幾時先整好！