麗新系老闆林建岳最近由娛樂版紅番過來財經版。前日麗展（488）同傳聞係新地（016）大股東郭炳湘，夾份高價搶走將軍澳地皮不在講，控有成個麗新系嘅麗國（191）噚晚突然宣佈，岳少阿媽余寶珠由非執董轉做執董，87歲先嚟做番個要孭飛嘅董事！
年紀大通常退休享清福，新地郭老太08年見三個仔內訌先出山，爭產風波稍為平息，佢都即刻退下來；純官都話彤叔唔想開會而辭咗周大福（1929）個非執董職務，林老太今次竟然掉轉，轉番做執董，認真耐人尋味！
袍金薪金僅365萬
查實麗新系最近不斷出現人事架構重組，先係岳少突然辭去麗豐控股（1125）主席同執董職務，由6月先至加盟嘅周福安接替。林老太至錫嘅乖孫，即係岳少位公子林孝賢同時被委任為麗展同豐德麗（571）執董。
岳少當時仲話，叫阿仔做執董係要畀多啲責任下一代，但家陣竟然要阿媽出山，一年袍金同薪金仲要得365萬，呢個價錢，家只係買到個車位咋喎。唯一嘅解釋，係岳少搞娛樂、飲食搞到差唔多，想做番財經版紅人，可惜，佢一出手買地就俾人話係明燈，佢應該度緊點樣威番次。
李華華
mailto:[email protected]