要選香港政壇癡心情長劍，八方第一個諗到嘅就係Dream Bear劉夢熊。雖然佢因為上海仔飯局而俾愛狼唾棄，但佢冇因為咁而死心。狼英被爆有個「消失的密室」，Dream Bear仲撐佢話家陣係港人治港唔係要聖人治港。
信中內容變萬能key
猶記得Dream Bear喺豬狼之戰期間，為狼英搭橋鋪路；今年2月唐唐爆出僭建醜聞，Dream Bear喺唐宮門外大派勸唐唐退選嘅信，內容誠懇真切。
不過有啲嘢叫做報應，自從狼英被爆有僭建密室後，有網民手痕拎番封信出嚟睇，發現原來內容係萬能key，只要將上款由唐英年改為梁振英，地址由「約道7號」改為「貝璐道4、5號」就已經變成一封完美嘅勸狼英辭職書。信入面話唐唐不斷以新謊言掩蓋舊謊言，今時今日套用喺狼英身上原來仲fit！
Dream Bear知道封信俾網民惡搞，即時反應係「哈哈哈」，叫網民凡事都要搞清楚，話唐唐當日涉用假圖則，而狼英個密室唔係佢起，性質係唔同喎。佢仲話《基本法》都係要港人治港，唔係要聖人治港；一旦狼英下台，「除咗搵個神去做」。佢話應畀時間狼英為香港人發展經濟、改善民生。Dream Bear死心塌地話若然狼英真係犯下大錯，佢唔排除有朝一日會整封勸辭職書佢嘆喎。
mailto:[email protected]