【本報訊】經歷黃金周一役滑鐵盧後，珠寶股紛指11月開始迎來不錯反彈。龍頭周大福（1929）及六福（590）均指香港生意已回復增長，六福更稱同店銷售升逾20%！分析相信於「博見底」心態下，短線將有利珠寶股走勢，但認為這增長勢頭只是由於去年比較基數低所致，擔心反彈屬「虛火」。
記者：吳綺慧 陳新政 鄭柏齡
受銷售回暖刺激，六福中午公佈業績後狂升10%，收報23.15元；而收市後才公佈業績的周大福，都漲5.4%至10.86元。經過一輪炒作，周大福明年預測市盈率已升至15倍，不算便宜。
估值非便宜 升幅有限
有外資分析員指出，六福11月的「強勢反彈」，主要原因是由於公司剛好去年11月的銷售基數較低，故今次增長反彈幅度，才有20%之高。
他說：「其實都係啲數字遊戲，舊年六福10月份生意增長50%，11月升20%，到12月先再增長30%。咁今年11月咪係easy base，所以升幅好似好勁咁，12月個數一定會升少啲，毫無疑問。」
另外，建銀國際消費行業研究董事陳兆昌亦指出，市場對珠寶股期望太低，所以今次銷售回復正增長，對市場氣氛都叫有點幫助，相信珠寶股最壞時間已過，但估值不便宜，故股價再升幅度有限：「係唔會V彈，但都叫有啲反彈啦！」
周大福主席鄭家純表示，生意在11月的確有好轉，中、港同店銷售都回復增長，但他不願意透露有關銷售增長的幅度。
鄭家純又指出，「下半年公司會逐步向好，會維持每年開舖200間。雖然我哋開舖多，但我哋每一間舖仍然係計得掂數，然係三幾個月就可以收支平衡，所以唔覺得策略有咩問題。對於三年收入『翻一番』的目標，我係好樂觀。」
不過，周大福董事總經理黃紹基則承認，香港地區的分店有需要「整合吓」：「旺區分店就會調整銷售組合，谷多啲生意；住宅區的舖頭，如果有重叠咗，都會再精簡！」有分析員相信，周大福會在香港關小量分店，有助控制租金成本；而人工支出方面，由於曾大減花紅，期內已見到顯著成效。
六福主席兼行政總裁黃偉常表示，對下半年表現充滿信心：「11月個銷售算唔錯，睇到啲客落大單多咗，購買力回升。聖誕同新年應該追到舊年嘅生意水平嘅，但增幅就一定追唔到㗎喇！」
不過，黃偉常難言珠寶行業已走過最壞境況，他個人是希望靠季節性需求帶動生意：「新年都多啲企業買足金送禮啦！」
瘋狂開舖 將自食惡果
香港零售管理協會主席麥瑞琼則表示，聽聞有個別珠寶商在11月有不錯成績，認為是好事；但以她個人的觀察，就沒有感受到11月銷售有非常強勁的反彈，對珠寶商12月的銷情亦不樂觀：「本地珠寶商太依賴自由行，放緩是必然的事，唔可以瘋狂開舖，否則最終自食惡果。」
內地遊客心聲
未有買珠寶
李先生：
「內地經濟放緩對我哋嘅影響不大，大家嘅購物消費能力還可以，不過今次來香港主要係買衣服，暫時未有買珠寶。」
想買乜就買
王小姐：
「這次來香港沒比上次特別用少咗錢消費，經濟對我個人來說係冇影響，來港想買乜就買乜，唔會特別慳錢。」
