由於Samantha病了，菲菲代筆一天。菲菲在家睇書，一向會開着電視機，為屋企製造人聲。點知前晚睇睇吓，電視無啦啦齋播琴聲，於是呢一個長3分半鐘，一句對白都冇嘅謝瑞麟（417）廣告，就成功吸引菲菲嘅眼球。
女主角撞車搞到失聰崩潰，男主角彈琴勾起女主角回憶，之後求婚。齋聽就幾老套，勝在男女主角演繹自然到位，畫面唯美，加上悅耳琴聲，效果催淚感人。
謝瑞麟於TVB黃金時間買咁長廣告時段，菲菲當然即時Call廣告界朋友，八吓要幾錢。原來單係前晚，翡翠明珠兩台廣告費，最少都要224萬元，都仲未計製作費。
望望公司10月公佈嘅半年業績，盈利大倒退65%，營業額亦只係增長6%，唔怪得要使咁多錢谷銷量。不過假如謝瑞麟廣告，繼續好似前晚咁播足咁長，以8月底止手頭現金1.19億元計算，佢播多53日就可清倉，可想而知今次屬公司破釜沉舟之舉，不過廣告有幾大成效？有待全年業績揭曉。
Fifi