金管局又話注資超過58億元，資金繼續湧港，應該會令到唔少人好興奮，不過，12月就嚟，晉佳至少唔會博個市一鼓作氣衝上去，保持中線揸實穩陣股嘅策略，至少升市又有得賺，反覆市況亦有機會賺，冇壞。
呢個時候大注持有大價股，或許比二、三線股打游擊好啲，晉佳認為今時今日少人問津嘅東亞銀行（023），亦有長遠留意價值。
論估值，以券商平均預測2012年數據計算，東亞市賬率1.2倍，股本回報率9.8%；至於經營極出色嘅恒生銀行（0011），市賬率2.6倍，股本回報率20.9%；受惠人民幣業務頭啖湯嘅中銀香港（2388）市賬率1.8倍，股本回報率14.9%，以資產配合回報計，東亞估值尚算合理。
以稅前盈利計算，東亞銀行今年上半年內地業務比重33%左右，相信未來內地業務唔會顯著擴充，但港資銀行去經營內地業務嘅好處，就少啲政治嘅包袱，批出貸款會比較注重風險管理問題，長遠業務表現會較穩健，賬面水份會少啲。
股權越來越歸邊
更重要嘅係，東亞銀行係少有規模唔大、但內地網點眾多嘅港資銀行，所以反而引嚟唔少外資銀行嘅興趣。你好難買滙控（005）股份買到可以對滙控構成好大影響力，但買東亞就可以，只要他朝得到佢較多股權，就方便喺中國霸地盤，亦可能方便外資股東所屬國家嘅企業喺內地做生意，掉番轉幫咗東亞拉生意，對東亞都有好處。
目前東亞第一大股東係西班牙嘅CaixaBank，持有17.01%權益，至於國浩（053）就持有東亞15.26%權益，三井住友銀行最近獲批准將持股上限由大約4.7%增加到最多9.9%，市場估緊東亞會唔會配股畀佢，去滿足資本要求，三井住友亦可以喺市場上面買貨，睇嚟長遠嚟講東亞股權只會越嚟越歸邊。
東亞股價由6月到家，形成「上升三角形」，30蚊係阻力，突破30蚊之後，相信股價會大漲小回，12月相信靜靜哋，分段吸亦冇壞，中線上望3年高位嘅36蚊水平。
晉佳
本欄逢周一、三及五刊出