港交所（388）宣佈批股集資62億銀，主要用嚟應付LME收購，呢間喺香港做獨市生意嘅交易所，今年升幅1%唔夠，明顯跑輸大市，隨着呢個事先張揚嘅籌旗活動完成，股價有望追落後，戰友不妨撈番啲坐吓。唔少人認為公司抽水預示股價見頂，對後市不利，其實都要睇乜嘢市況，好似呢排資金市，唔少股份抽水後都照砌。一方面抽水股多屬強股，強者越強乃今年主題，另一方面，港滙持續強勢，熱錢湧港搵出路，抽水股成為資金瞄準目標，喺良性循環下，形成越抽越升現象。
早前公佈中期業績嘅富士高（927），股價連續兩日回吐，由高位計累跌逾一成，可趁低撈博再破頂。集團中期盈利大增8倍至6806萬銀，較去年下半年高出四成，盈利勁升主要因為轉攻高檔耳機市場，毛利率大升7.5個百分點至21.8%，除中期息3仙外，派特別息4仙，假設末期息維持去年水平，現價息率達7.6厘，年度化市盈率不足9倍，上升機會遠大於下跌，調整提供寶貴上車機會。
唐牛