香港正準備為男士享有三天侍產假嘅規定立法，預計最快明年推行，有議員等唔切政府立法，已決定向議員助理提供侍產假，吸引男士應徵。好似高登男神、新民主同盟范國威咁，上星期喺勞工處登廣告請議員助理，就標明會畀男士侍產假，成為一眾議員嘅先鋒。外號「咖喱飯」嘅佢同八方講，決定畀成功入職嘅男助理五日侍產假。佢話，由於議員助理經常要外勤，有唔少擔擔抬抬工作，相信侍產假有助吸引男士們申請佢份工，當然女性想做一樣歡迎啦。咖喱飯以市價9,000至10,000蚊請議員助理，唔知各位高登仔有冇意效力高登男神呢？