人一旦擁有越多財產，就會越想保障佢，隨着全球經濟重心轉移，亞洲及中國的保險需求肯定大增。新股巨無霸人保（1339）上市，照計應該齋講市場前景都sell得吓，但人保今次居然要破紀錄用17間投行進行承銷，簽定大量基礎投資者。種種迹象話俾大家知，呢隻嘢唔會太好賣。
人保最大的問題，其實唔係佢嘅業務質素，而是定位同股權結構。人保最大賣點，係佢在內地產險市場具有領導地位，但呢一part業務，其實好早投資者已經可以分享得到─透過買在香港上市多年的子公司財險（2328）。財險的貢獻，舊年仍然佔人保整體盈利高達90%。至於人保的壽險，雖然自05年以來增長迅速，但同人壽（2628）和平保（2318）比，仲爭幾條街。所以，如果海迪係一個芬佬，我睇好產險的話，我會買2328；我睇好壽險的話，我咪買2628囉！我有咩需要買人保？
好似人保呢類咁依賴個仔嘅阿媽，市場通常會俾一樣嘢叫holding company discount，即係佢要平財險一大截，在市場先有吸引力。但呢個所謂「一截」係幾多，就真係無咩例子可以參考。人保唯一嘅好處係街貨唔多，呢個因素應該會支持到股價，唔會重蹈復藥（2196）的覆轍。
海迪