CY僭建風波發展至今，謊話連篇，誠信已然破產。再加上周遭梁班中人護短心切，齊齊睜眼說瞎話，全力合演一場「誠信冚家鏟」的荒誕劇。
先有民建聯譚主席表示，CY既就僭建問題作過公開交代，即咪係承認咗自己有疏忽不謹慎之處囉。言下之意，就係特首都已經覺得自己有小小小小唔啱，咁我哋都仲唔息事寧人收貨？況且事件尚未提升到涉及誠信層面喎。呢啲說話，第二個講未必有說服力，但係作為慣了騎牆轉軚、出爾反爾的代表大黨，禮義廉的誠信標準門檻在哪，大眾心裏明白。
護主抽水 永不落空
所以特首的缺失在這群小眼中，不過小菜一碟，不值一晒。然而當日CY同樣以僭建為題，大造唐唐的誠信文章之際，又唔見該黨開腔幫口，拔刀相助，再而好似家陣咁轉移視聽，只係着意敦促長官盡快處理好這些瑣事，免得徒費精力，耽誤民生方面工作云云。
另外嗰位之前明嘲暗諷、句句夭心的人大常委「范婦人」，當被傳媒問及對事態發展的意見，竟然祭出不宜討論香港內部事務為由，拒絕再評事件。恕我學淺，乜香港事務唔係納入全國嘅政務範疇嘅咩？咁係咪表示以後啲尊貴嘅人大代表並不應該對治港一事指手劃腳？係就一天都光晒。
然後她還藉詞自己要專心處理人大代表的選舉工程，所以沒有好好閱讀有關CY大宅僭建的14頁報告，若妄自評論，那是不公平的。咁試問之前連嗰幾頁紙嘅報告都未見，婦人又何解急於說三道四。我看現在不是時間緊張，未暇分身，而是票源緊張，少說為妙。
身為行政會議一員的張志剛則承認，發生僭建一事並非理想（我諗佢嘅意思係「被揭發」唔理想啫），總之「點都改變唔到」，呢句我深深認同，正如CY做咗特首一樣。跟住就緊隨梁班口徑，CY喺件事上已處理得很快，係囉，佢不過一路要等啲「無厘啦更」嘅司法程序完咗啫嘛。「佢又唔係『偷雞』，道過歉，事實都交代咗，凡事也應該有個了結。」此言成理，因為CY真係唔係「偷雞」，佢係唔單止「偷雞」，仲要係「死雞」都唔認。而市民亦當只求CY有個「了結」，而非現在的「了之」。
至於他還再三強調，僭建事件與行政會議無關，完全是CY自己的事。如此劃清界線，我還以為聽錯。現在行會成員的集體負責、共同承擔意識淪落於此，實在叫人嘆息。不過，想想當日食裏扒外的也不就是那位召集人CY，其身作則，一切早可預言。
盧先亞