【特稿】
崩牙駒在囚逾13年，矢志靠昔日舊部助他再戰江湖，然而被視為「頭馬」的豪仔傳聞也受敵陣水房賴恩惠及澳門當局「招安」，為此曾與崩牙駒鬧翻，或令對方復出大計缺少重要棋子。
原名黃達豪的豪仔，當年與軍師石岐嘟同被重囚10年半，獲釋後想重投賭業但處處碰壁。「水房賴竟出手相助，豪仔最初唔受，但阿賴暗中幫他創立『吉星集團』，隨即宣佈地盤歸14K，仲提醒他預留利益畀崩牙駒」。
豪仔亦盛傳受到澳門當局招安。「政府知崩牙駒最聽豪仔話，搵人接觸豪仔，望佢勸掂大佬出獄後唔好搞事，就畀佢哋繼續搵錢，否則搞到佢哋粥水都冇得食」。豪仔探監勸大佬「收火」，卻惹來崩牙駒怒斥「你家叻嘞！識得駁大佬嘴嘞！」認定他替政府及敵人說項，豪仔則覺得崩牙駒「唔化」，二人為此鬧翻，崩牙駒把復出大計轉交另外兩名門生「阿飛」及「阿龍」。豪仔其後雖與崩牙駒言和，但雙方已有隔膜。
《蘋果》記者