公民抗命四年，民間電台日前獲終審法院判上訴得直，獲撤銷控罪。有份提出上訴嘅阿牛曾健成，噚日專程到歌連臣角紀念花園拜祭已故前支聯會主席司徒華，帶埋判決書燒畀佢老人家，希望華叔在天之靈知道今次公義嘅判決。阿牛仲承諾幫華叔翻案，寫信畀梁振英，要求平反華叔嘅罪名同罰款。
阿牛同八方講，原本華叔一齊上訴，舊年佢不幸過身，先剔除上訴人之列，但佢仲記得四年前被檢控時，華叔講過一定要上訴到底，就係呢份堅持，終於反敗為勝。
華叔08年參與民間電台嘅直播節目，被控違反《電訊條例》，連同黃毓民、劉慧卿、李永達、李卓人和陳偉業六人被判罪成及罰款1,000元。阿牛話贏出官司只係踏出一小步，會繼續擴播，直至爭取開放大氣電波。