利嘉閣總裁廖偉強炒股應該有一手，佢將裁員呢個壞消息，變成好消息咁演繹，換轉係炒股，應係壞當好炒一餐。
廖總日前向員工發出公司收縮嘅訊息，旋即流晒出街，廖總噚日再整多個訊息畀員工，指裁員消息睇落負面，但其實有利好作用㗎。廖總先不停讚自己，話公司咁樣做起到龍頭作用，「率先帶起調整行動，有遠見」，公司係「樓市權威」云云。至於點利好？佢認為，利嘉閣裁員會令到「業主盡快減價，發展商亦會恐懼，訂價克制」，話唔定同業主傾續租時，佢哋仲會減租，幾好呀。
香港有冇咁好同情心嘅業主，見你生意唔掂而減租，真係冇人知，但業主因為代理唔掂而減價放盤？家個市係交投縮，唔係樓價大跌，除非好等錢使啦，如有能力持貨，咪揸住收租先囉，根本唔急住放。就連廖總都話，家業主實力強㗎喎。