香港呢幾日受冷鋒侵襲，前晚啲德國波都係；加埋8場德甲德乙，有6場都係開下盤，其中力爭德甲3連霸嘅多蒙特，仲爆大冷喺主場俾升班馬杜塞爾多夫逼和1:1，連1.08倍熱W都保唔住；嚟緊禮拜六如果作客輸俾「1哥」拜仁慕尼黑，之後就可以叠埋心水爭歐聯同德盃囉。
多蒙特為咗留力鬥拜仁，教練高路普喺前晚主場對杜塞爾多夫場波，畀兩名攻守主力馬里奧葛斯同曉姆斯休戰；但賽前仍然被一致睇好，主W同埋[-1]「主勝」分別只得1.08倍同埋1.42倍。而佢哋亦有個好開始，憑中場巴拉斯塞高斯基入波而半場領先1:0；點知下半場就走樣，仲喺78分鐘俾對手列辛加攻入而被追成1:1；之後杜軍喺87分鐘雖有艾雲保利域領紅而少打一個，但佢哋都把握唔到優勢，以1:1完場。爆個7.7倍嘅和波出嚟。高路普賽後就話：「我哋逼得唔夠緊，又製造唔到好多入波機會。」我求大俠就認為，如果唔係高路普玩留力，多蒙特未必會出事，今次球迷真係俾佢累死。
多蒙特跌咗兩分之後，落後喺周三晚作客弗賴堡嘅拜仁8分；嚟緊喺禮拜六佢哋會喺安聯鬥拜仁，若然佢哋輸咗，而拜仁又成功喺弗賴堡身上全取3分，彼此嘅差距就有成14分；到時多蒙特真係要寄望有奇蹟出現，先有贏到聯賽冠軍。
盃賽仍叫兩飛
雖則多蒙特喺德甲條路唔易行，但好彩仲有兩飛叫緊。除咗入咗德盃第3圈（主場同漢諾威爭入8強），喺歐聯亦肯定以小組首名身份入16強，成功避開兩大熱門西甲嘅巴塞隆拿同埋英超嘅曼聯，亦唔會即刻遇到同組嘅皇馬。上季佢哋攞咗德甲同埋德盃，又殺入歐聯分組賽，盈利破紀錄達3,430萬歐元（約3.44億港元）。係人都知歐聯係個金礦，拜仁上屆喺決賽雖然輸咗畀英超車路士，但都執成4,170萬歐元。一個唔覺意俾多蒙特轆咗入今屆決賽，保守估計有4,000萬歐元落袋，到時仲唔發過豬頭呀！
除咗多蒙特，另外兩支前列球隊史浩克04同埋法蘭克福都出事，分別作客輸畀漢堡1:3同埋喺主場輸畀緬恩斯1:3；反而上場吞咗拜仁5隻光蛋嘅漢諾威就反底，主場贏格雷特霍夫2:0，仲要開埋個2.95倍嘅[-1]「主勝」。