呢兩日唔少戰友開始轉淡，認為港股會「雙頂」散水，但魏力認為，恒指月初要跌至50日線（21303）方見支持，今次回到20日線（21617）已見承接，走勢浪比浪高，加上跌市成交唔大，可見於現價沽貨的投資者唔多。此外，細價股炒到㷫烚烚，反映莊家未驚過，如何大散？
值得留意，花旗昨上調逾廿隻內房股的評級和目標價，雖然內房股升幅已巨，但與花旗的新目標價比較，普遍仍有20%至30%水位，當中合生創展（754）最誇張，目標價由9.50元調高至19.75元，較現價水位高達87%。隨着其他大行加入做「啦啦隊」，未來數季內房股將是炒作重點。
炒股唔炒市，今日不妨冷吼一隻資產重組股──北人印刷（187）。公司月初公佈，向控股公司京城控股出售旗下6間公司股權，並獲注入天然氣瓶設備業務，變身燃氣設備股之餘，更可套現近3億元。其業務類似中集安端科（3899），既受惠清潔能源國策更涉足核能，炒作賣點多多。
重組消息公佈後，北人已逐步炒上，但市值仍僅2.7億元，與殼股無異；與中集安端科的88億元市值比較，更顯然未反映其盈利潛力，中線睇4蚊，市值亦不過4億元。
魏力
http://www.facebook.com/2012jason