中國燃氣（384）噚日舉行業績會，重點唔係業績，而係大股東兼董事總經理劉明輝重獲自由後首次公開露面。劉總清楚記得自己闊別公司585日，咁耐冇見，劉總清減咗，亦都精神咗，講嘢比以前謙厚，憶述兩年前俾公安拘捕同埋之後發生嘅事，佢話「過去嘅事已經過去」，唔會再追究之前中傷佢嘅人喇。
「同中石化唔係敵人」
唔知係咪要賀一賀劉總，噚日業績會嘅現場佈置得紅噹噹，相對以前常用的素色背景，喜氣洋洋得多。
雖然中燃事前講明劉總前事不提，但佢始終都要講番幾句。佢用「刻骨銘心」來形容過去兩年嘅經歷，但就強調過去嘅事已經過去，唔再追究一班中傷自己嘅人。
佢又叫大家唔好再講中燃同中石化（386）嘅合作係「化敵為友」，皆因中燃同中石化從來唔係敵人，總之一切都要和和氣氣咁話。