梁特首回應山頂大屋僭建之事，不召開記者會，不到立法會解畫，但係發表一份一萬二千字嘅文字稿，各報章以細字體全文發表，足足一大版，左丁山在星期六晚稍為得閒，揸住張報紙細讀之，讀讀吓幾乎瞓着，冇心機再讀落去，不過仍然記得整件事嘅重點係：（一）去年十月梁特首已知家中有僭建地下室，搵人封咗佢，競選時絕口不提；（二）利用報紙揭露唐英年九龍塘大宅有僭建一事，大肆攻擊唐英年冇誠信，令唐之民望插水，之後大打民意牌，呼籲選委專重民意。
當時好多人（包括記者、編輯、女專欄作家）不滿意唐英年係富二代，駡佢係二世祖，有婚外情，借老婆過橋等等，認為唐梁之中，給梁一個機會，比較啱聽。
如此這般，中央借民望調查，喝令挺唐派轉軚，改投梁振英一票，現在回想起來，所有挺梁及突然挺梁人士懵然，全部係受操控而不自知，現在有啲人後悔還來不及。當知道民意調查呢回事，係可以被借刀殺人嘅，一啲自以為聰明嘅記者、報紙，俾人利用到盡，今日瘋狂踩梁咪由得佢地囉。
以前克林頓在九十年代初出馬競選總統時，曾出現「白水疑案」、希拉利內幕交易疑案，入主白宮後，法律顧問在華盛頓特區嘅森林死亡疑案，最高潮係萊溫斯基偷情案，克林頓用盡辦法，一一甩身，共和黨莫奈他何，到今年克林頓仲施展渾身解數，幫奧巴馬競選連任成功㖭，激死共和黨。當年華爾街日報曾講解克林頓團隊嘅化解危機招數，綜合嚟講，第一招係拖字訣（stalling），逢遇到質疑，索取資料，克林頓陣營一味拖得就拖，絕不主動合作，記者唔識問，就會帶領記者走去錯誤方向追查，拖到選舉之後。第二招就係阻延（obstruct），盡量阻止事件走上國會聽證會或由司法部調查，打盡合法茅波。第三招，倘第一第二招用盡，真係入到國會調查階段（如萊溫斯基），就組織皇牌陣容嘅律師團隊，大打法律牌，技術上否認，令對方氣結，最後不了了之。
梁營大概老早已經熟讀兵書，展開架勢，所以係用緊克林頓第一招stalling，拖到今日上咗特首位，毫無選舉法律責任之後，先至發表萬言書，公眾睇得明算好彩。梁先生一句「我當時的認知就是僭建處理了，僭建就不存在。」大家讚吓嘞，老實人唐英年點識講呀！