曾以筆名方卓如寫財經專欄嘅會計師龔耀輝近年相當低調，只係久唔久見佢用真名寫專欄，早幾個月好多人以為佢會出選立法會會計界議員，點知佢直情連影都冇，原來佢鍾意咗陳豪鍾意嘅嘢，新近投資咗銅鑼灣一間咖啡店。
最低消費70蚊
龔耀輝投資呢間咖啡店叫The Coffee Academics，係咖啡連鎖店caffe HABITU嘅姊妹店，老闆係創興銀行（1111）創辦人廖寶珊家族第三代成員廖偉芬（Jennifer）。咖啡店已開咗幾個月，呢個星期一搞咗個酒會，部份人收到龔耀輝嘅請柬，先知佢走去賣咖啡。
龔耀輝強調，自己只係小股東，佔好細份，純粹想學做其他生意，仲話近年冇玩低調，只係專心搞自己間顧問公司啫。龔耀輝仲係會計師公會理事會理事，任期兩年，如果要連任，明年底先要出來選，最近佢就積極幫老友鄭中正尋求連任。
講番The Coffee Academics，呢間咖啡店應該走中檔路線，門口貼住張紙寫明最低消費70蚊，一杯咖啡廿幾蚊至五十幾蚊都有，地下飲咖啡，一樓係餐廳，各適其適。Jennifer 03年開caffe HABITU，發展到有姊妹店，證明富二、三代當中都有識做生意嘅。
李華華
mailto:[email protected]